ഒരിന്ത്യ പെറ്റ മക്കൾ

 മത അടയാളങ്ങളൊക്കെ

മായ്ച്ച്, തേച്ച്‌ എന്റെ ഇന്ത്യ.

വിദ്യാലയങ്ങളിൽ ഇപ്പോൾ 

എല്ലാവരും ഒരിന്ത്യ പെറ്റ മക്കൾ

ഹിജാബ് മാറ്റി, സിക്ക് തലപ്പാവും.

കുറി മായ്ച്ചു, കയ്യിലെ ചരടും.

ഒരു പടി കടന്ന് അദ്ധ്യാപകർ

മംഗല്യ തിലകം മായ്ച്ചു

പൊട്ടിച്ചു താലി മാലയും

പിന്നെയാ കുരിശ്, ഏലസ്,

രുദ്രാക്ഷ മാലകളും...

എല്ലാവരും ഒരിന്ത്യ പെറ്റ മക്കൾ.

നാനാത്വത്തിലെ ഏകത്വം മാഞ്ഞു

ഏകത്വത്തിൽ തന്നെ ഏകത്വം.

ഭരണ കേന്ദ്രങ്ങളിലേക്കും

ചുവടു വെച്ചു ഒരിന്ത്യ പെറ്റ മക്കൾ.

മാതൃകയായി മന്ത്രിമാർ,

ജന പ്രതിനിധികൾ...

കുറിയും, ചരടും, തൊപ്പിയും, തലപ്പാവും, കാഷായ വസ്ത്രവും മാറ്റി അവരും.

ഇപ്പോൾ എല്ലാവരും ഒരിന്ത്യ പെറ്റ മക്കൾ.

സ്വപ്നത്തിന്റെ അന്ത്യത്തിൽ തിരിഞ്ഞു നോക്കുമ്പോൾ ചില അടയാളങ്ങൾ മാത്രം അവിടെ അങ്ങനെ നിന്ന് എന്നെ നോക്കി കളിയാക്കി ചിരിക്കുന്നു.

കയ്യിൽ നുള്ളിയ എനിക്ക് തെറ്റി നുള്ളിന് നല്ല വേദന.