താണ് താണ് മല ശൂന്യമായി
ഊറ്റിയൂറ്റി പുഴ താണ് പോയി
കളയേറി പ്രാണ വായു വറ്റി
പുഴയിലാ ചൂണ്ട നോക്കുകുത്തി
മല പോയി മരതകക്കാട് പോയി
കാട്ടിലെ പാട്ട് മാഞ്ഞുപോയി
കളകളം തോടിതെങ്ങോ പോയി
കാട്ടു കുളിരുമൊഴിഞ്ഞു പോയി
പ്രളയമൊരെണ്ണം വന്നു പോയി
അന്നെനിക്കൊത്തിരി തന്നു പോയി
കൊടുങ്കാറ്റൊരെണ്ണം വന്നു പോയി
അന്ന് പലതുമെടുത്ത് പോയി
പിന്നെ വരൾച്ച വന്നു പോയി
കുടി നീരെടുത്ത് അന്നു പോയി
പലരോഗ പീഡകൾ വന്നു പോയി
പലരെയുമന്നത് കൊണ്ട് പോയി
കാതോർത്തിരിപ്പു കാലമായി
ഒരു കിളി പാട്ട് പൂതിയായി
കൺ നട്ടിരിപ്പൂ ദൂരെയായി
പുഴയൊന്ന് വേണം നേരെയായി
ആരെന്റെ ഭാഗ്യമെടുത്തു പോയി
ആരെന്റെ ചുറ്റും കലുഷമാക്കി
ആ പുഴ ചൂണ്ട വലിച്ചു നോക്കി
കണ്ണാടിയായത് വന്നു പൊന്തി.
